اویسی کی آمد پر سابق ایم ایل اے محمد اظہار کے چہرے پرمسکراہٹ

کوچادھامن کے سابق ایم ایل اے محمد اظہار کی اویسی سے ملاقات، اویسی کی آمد پر  ایم ایل اے

 محمد اظہار کے چہرے  پر مسکراہٹ۔

کوچادھامن(کشن گنج)

کوچادھامن کے سابق ایم ایل اے محمد اظہار کے چہرے پر آج ایک خاص مسکراہٹ دیکھی گئی، جب آل انڈیا مجلس اتحاد المسلمین (ایم آئی ایم) کے قومی صدر بیرسٹر اسدالدین اویسی ان کی رہائش گاہ پر پہنچے۔

اویسی صاحب کے استقبال کے لیے محمد اظہار نے خود آگے بڑھ کر پرجوش انداز میں ان کا خیرمقدم کیا، اور دونوں کے درمیان گرمجوشی سے مصافحہ اور گفتگو ہوئی۔

سیاسی حلقوں میں یہ ملاقات خاصی معنی خیز سمجھی جا رہی ہے۔ یاد رہے کہ محمد اظہار عرف اظہار اسفی نے 2020 کے اسمبلی انتخابات میں ایم آئی ایم پارٹی کے ٹکٹ پر کامیابی حاصل کر کے کوچادھامن اسمبلی حلقہ سے ایم ایل اے بنے تھے۔
تاہم بعد میں انہوں نے ایم آئی ایم سے علیحدگی اختیار کر کے آر جے ڈی (راشٹریہ جنتا دل) میں شمولیت اختیار کر لی تھی۔

ذرائع کے مطابق، موجودہ اسمبلی انتخابات میں آر جے ڈی کی جانب سے انہیں ٹکٹ نہ ملنے کے بعد، محمد اظہار نے اپنے “پرانے سیاسی گھر” ایم آئی ایم کی قیادت سے دوبارہ رابطہ قائم کیا ہے اور وہ اس بار ایم آئی ایم کے امیدوار محمد سرور عالم کی حمایت میں ہیں۔

سیاسی مبصرین کا کہنا ہے کہ اگر یہ حمایت عملی طور پر برقرار رہی تو کوچادھامن کے انتخابی میدان میں نیا توازن پیدا ہو سکتا ہے۔
اویسی اور اظہار کی ملاقات نے بلاشبہ بہار کی سیاست میں نئی چہل پہل پیدا کر دی ہے، اور یہ دیکھنا دلچسپ ہوگا کہ اس سیاسی تبدیلی کا اثر آنے والے انتخابات پر کس طرح پڑتا ہے۔